Փնտրվում է քաղաքապետ... - TopArm.Info

Լրահոս

вторник, 9 июля 2019 г.

Փնտրվում է քաղաքապետ...




Մի շարք քաղաքացիներ այսօր Երևանի Արշակունյաց փողոցից աղբ են բերել Երևանի քաղաքապետարանի դիմաց՝ հանձնելու քաղաքապետարանին: Ակցիայի կազմակերպիչներից էր Երևանի ավագանու նախկին անդամ (Երկիր Ծիրանի) Սոնա Աղեկյանը: Նրան և մի քանի ակտիվիստի ոստիկանությունը բերման ենթարկեց բաժին:

Իրականում քաղաքացիներին կարելի է հասկանալ. գարշահոտության, պոտենցիալ համաճարակի բնի մեջ ապրելը այնքան էլ հաճելի չէ, հատկապես եթե մեկ տարի առաջ գնացել ես ընտրատեղամաս և 80 տոկոս վստահության քվե տվել նոր իշխանություններին, նոր քաղաքապետին: Նոր քաղաքապետը, սակայն, մեկ տարվա մեջ գտավ ժամանակ ամեն ինչի համար՝ կոռուպցիոն գործարքների մեջ մտնելու, խնամի-ծանոթ-բարեկամներին գործի դասավորելու, անգամ գովազդում նկարվելու, և միայն մեկ բանի համար Մարությանը այդպես էլ ժամանակ չգտավ՝ իր բուն պարտականությունները կատարելու: Եվ այսօր նրա պարտականություններն իր փոխարեն փորձում են կատարել հպարտ քաղաքացիները, որոնց հպարտությունը չի ներում զիբիլի մեջ ապրել:

Քաղաքապետարանն, ի դեպ, յուրացրել է տակից դուրս գալու նուրբ արվեստը: Արդեն իսկ սլաքները ուղղվել են Սանիթեքի դեմ՝ ակնարկելով, որ աղբը սխալ հասցեով է բերվել: Ավելորդ չենք համարում թարմացնել քաղաքապետարանի հիշողությունը և հիշեցնել, որ «Սանիթեքի» հետ պայմանագիրը կնքել է քաղաքապետարանը և միայն քաղաքապետարանն է իրավասու և պարտավոր պահանջել ու հետևել «Սանիթեքի» կողմից իր պարտավորությունների պատշաճ մատուցմանը: Իսկ քաղաքացիները պահանջել և պահանջելու են իրենց կողմից ընտրված քաղաքային իշխանություններից, որոնց աշխատանքի մակարդակը ի դեպ «Սանիթեքի» աշխատանքի մակարդակից ոչնչով չի տարբերվում:

Ընդ որում, ակնհայտ է իշխանությունների կողմից երկակի ստանդարտների կիրառումը: Երբ Սոնա Աղեկյանը նույն աղբահանության խնդրի շուրջ կռիվ էր տալիս Տարոն Մարգարյանի դեմ, Փաշինյանի թիմակիցները ԵԼՔ-ից վերջինիս պադդեռժկա էին անում, հայտարարում, որ պայքարը ճիշտ է: Այսօր արդեն, երբ Աղեկյանի թիրախում Տարոնը չէ, այլ՝ Հայկը, նրա բռնած գործը սխալ է, ինքն էլ հակաօրինական գործողություններ է կատարում: Կամ արդյո՞ք երկակի ստանդարտ չէ այն փաստը, որ մեր երկրում պետական հիմնարկի դիմաց աղբ դնելը ավելի հակաօրինական գործարք է, քան այդ նույն պետական մարմինների մուտքերն ու ելքերը արգելափակելը…


Աղբյուրը՝ mediamall

Դիտված նյութեր